Сонгинохайрхан дүүргийн нутаг дэвсгэрт бүртгэгдэж буй гэмт хэргийн гаралтыг бууруулах, өмчлөх эрхийн эсрэг болон хүний эрүүл мэндийн халдашгүй байдлын эсрэг үйлдэгдэж буй гэмт хэрэг, зөрчлөөс урьдчилан сэргийлэх, иргэдийн хууль, эрх зүйн мэдлэг, сонор сэрэмжийг дээшлүүлэх, байгууллага, иргэдийн хамтын ажиллагааг бэхжүүлэх зорилгоор “Сонор сэрэмж” болон “Аюулгүй гудамж” аяныг дүүргийн хэмжээнд бүтэн жилийн хугацаанд хэрэгжүүлж байгаа билээ.

Өнөөдөр /2026.06.29/ тус аяны хагас жилийн үр дүнг дүгнэж, урьдчилан сэргийлэх ажилд идэвх санаачилгатай оролцсон хүн, хуулийн этгээдийг шалгаруулж, урамшууллаа. Шагналыг дүүргийн иргэдийн Төлөөлөгчдийн Хурлын дарга Б.Золбоо, Цагдаагийн газрын дарга Г.Байдраг, Прокурорын газрын орлогч Б.Гүнсэл нар гардуулав.

Аяны хүрээнд гэмт хэрэг, зөрчил ихээр үйлдэгддэг болон үйлдэгдэж болзошгүй байршлуудад эргүүл, хяналтыг тогтмолжуулах, архи, согтууруулах ундаагаар үйлчилдэг аж ахуйн нэгжүүдтэй хамтран ажиллах, согтууруулах ундааны эргэлт, хамааралтай иргэдэд хяналт тавих, хөршийн хяналтыг сайжруулах, хулгайлах, дээрэмдэх, танхайрах, залилах зэрэг гэмт хэрэг, зөрчлөөс урьдчилан сэргийлэх олон талт арга хэмжээг үе шаттайгаар хэрэгжүүлж буй юм.

Хэрэгжүүлсэн арга хэмжээний үр дүнд дүүргийн хэмжээнд бүртгэгдсэн гэмт хэрэг 6.3 хувиар, зөрчлийн гаралт өмнөх оны мөн үетэй харьцуулахад 34.4 хувиар буурсан байна.