Сонгинохайрхан дүүргийн Гамшгийн эрсдэлийг бууруулах орон нутгийн зөвлөлийн гуравдугаар улирлын ээлжит хурал өнөөдөр /2025.10.17/ Нийслэлийн Онцгой байдлын газрын Онцгой комиссын хурлын танхимд боллоо.

Хурлаар 2025 оны гуравдугаар улирлын байдлаарх үйл ажиллагааны гүйцэтгэлийн тайланг танилцуулж, хэлэлцэв. Мөн дөрөвдүгээр улиралд хэрэгжүүлэх ажлын төлөвлөгөөнд зөвлөлийн гишүүдийн саналыг нэгтгэн хэлэлцэж, баталлаа.

Өнгөрсөн хугацаанд Сонгинохайрхан дүүргийн Гамшгийн эрсдэлийг бууруулах орон нутгийн зөвлөлөөс гамшгийн эрсдэлийг бууруулах чиглэлээр шинэлэг, үлгэр жишээ олон ажил, арга хэмжээг хэрэгжүүлсэн байна.

Тухайлбал, 2024 оны 12 дугаар сарын 13-нд “Гамшгаас урьдчилан сэргийлэх зөвлөгөөн”-ийг анх удаа зохион байгуулж, зөвлөгөөнөөс гарсан саналуудыг 2025 оны ажлын төлөвлөгөөнд тусган хэрэгжүүлсэн. Энэхүү зөвлөгөөнөөр гал түймэр, гамшиг ослын үед яаралтай тусламжийн болон шуурхай албаны тээврийн хэрэгслүүд нэвтрэхэд саад болдог мухар гудамж, хаалт, хашлагууд зэргийг буулгах шаардлагатай байгааг иргэд, албан хаагчид онцолсон бөгөөд үүний дагуу 2025 оныг “Орц, гарц чөлөөлөх жил” болгон зарласан юм.

Уг аяны хүрээнд хийгдсэн ажлууд үр дүнгээ өгч, нийслэлийн хэмжээнд үлгэр жишээ туршлага болж, бусад дүүргүүд хэрэгжүүлж эхлээд байна.

Мөн дүүргийн иргэдийн Төлөөлөгчдийн Хурлын дарга бөгөөд Гамшгийн эрсдэлийг бууруулах орон нутгийн зөвлөлийн тэргүүн Б.Золбоогийн санаачилгаар Гамшгийн эрсдэлийг бууруулах олон улсын өдрийг угтан 2025 оны 10 дугаар сарын 2-нд “Санхүүжилтийг гамшгийн үед зарцуулахаас илүү, даван туулах чадавхыг бэхжүүлэхэд чиглүүлье” уриан дор “Өсвөр үе — Бидний ирээдүй” нэгдсэн арга хэмжээг анх удаа зохион байгуулав.

Дүүргийн 30 сургуулийн 700 гаруй ахлах ангийн сурагч оролцсон тус арга хэмжээ нь өсвөр үеийнхний мэдлэг, ур чадварыг нэмэгдүүлэх, урьдчилан сэргийлэх болон бэлэн байдлыг хангахад чиглэсэн бөгөөд эцэг эхчүүд, багш нар, иргэдийн талархлыг хүлээгээд байгаа юм.

Хурлын үеэр зөвлөлийн гишүүд Онцгой байдлын байгууллагын ууган анги Гал түймэр унтраах, аврах 10 дугаар анги болон Онцгой байдлын албаны музейг үзэж, сонирхлоо.