Урьдчилан сэргийлэх чиглэлээр улс, нийслэлийн хэмжээнд шинээр олон ажлууд санаачлан, салбартаа анхдагч болсон арга хэмжээнүүд зохион байгуулагдсан жил байлаа. Тухайлбал "Өсвөр үе-Бидний ирээдүй", "Модуль сургалт", "Өсвөрийн сэргийлэгч бүлгэм" арга хэмжээнүүд нь олон нийтийн талархлыг хүлээсэн, улс, нийслэлийн хэмжээнд онцлох ажлууд болж чадсан юм. Цаашид жил бүр эдгээр ажлуудыг үргэлжлүүлэн зохион байгуулах болно.

Түүнчлэн давхардсан тоогоор 600 гаруй мянган хүнд урьдчилан сэргийлэх мэдээ, мэдээллийг хүргэж ажилласан бол хууль, хүчний байгууллагуудын тоног төхөөрөмж, техник хэрэгсэл, автомашиныг үе шаттай шинэчилж, шинээр худалдан авалт зохион байгууллаа. Мөн орчин үеийн техник, технологийн шийдлүүдийг цаг алдалгүй нэвтрүүлж үерийн угсардаг далан, энгэрийн 4G камер, шүүх шинжилгээний 3D VR төхөөрөмж зэрэг олон техник хэрэгслүүд байнгын хэрэглээнд ашиглагдаж байна. Баянгол, Сонгинохайрхан, Хан-Уул дүүргийн эрүүгийн хэргийн анхан шатны шүүх насанд хүрээгүй гэрч, хохирогчийн тусгайлсан өрөөтэй болсон бол АТГ-тай хамтран Шударга ёсны клубын үйл ажиллагааг өргөтгөлөө.

Дүүргийн Цагдаагийн газар, I, II, III хэлтэс тус бүр өөрсдийн хариуцсан нутаг дэвсгэр тус бүрт архины хамааралтай, гудамж талбайд архидан согтуурдаг, олон нийтийн амгалан тайван байдлыг алдагдуулдаг, биеэ үнэлэлт зохион байгуулдаг байршлуудад олон удаагийн давтамжтай арга хэмжээ зохион байгуулсны үр дүнд гудамж талбайд үйлдэгдэх гэмт хэрэг 28 хувь буурсан үзүүлэлттэй шинэ оноо угтаж байна. Хотын иргэдийн дунд биеэ үнэлэгчид цугладаг нэртэй Саппоро хавь үндсэндээ цэгцэрч дээр дурдсан асуудлууд түүх болон үлдэж чадав.

Онцгой байдлын байгууллага, Үндэсний аврах бригадтай хамтран дүүргийн хэмжээнд анх удаа өсвөр насны 800 орчим хүүхдүүдийг хамарсан гамшгийн үеийн практик сургалтыг хийж гамшиг ослын үед хэрхэн аврах ажиллагаа явагддаг болон бэлэн байдлыг хэрхэн хангаж, аюул ослыг даван туулах талаар бодитой арга хэмжээ зохион байгууллаа. Япон улсад зохион байгуулагддаг зам тээврийн ослоос урьдчилан сэргийлэх модуль сургалтыг бодитоор өргөн хүрээнд улсын зөвлөлтэй хамтран 2500 гаруй хүүхдийг хамруулан анх удаагаа амжилттай зохион байгуулав. Гамшгийн эрсдэлийг бууруулах бүтцийн болон бүтцийн бус олон арга хэмжээ авч хэрэгжүүлсэн бөгөөд шинжлэх ухааны байгууллагуудтай хамтран ажиллаж бодит судалгаан дээр суурилсан хариу арга хэмжээнүүдийг авч хэрэгжүүлэхэд бэлэн болоод байна.

2025 оныг орц, гарц чөлөөлөх жил болгон зарлаж яаралтай тусламжийн болон тусгай ангиллын тээврийн хэрэгслүүд зорчиход учирдаг саад бүхий гудамж, хашаа, хайсыг чөлөөлөх ажлууд хийгдэв. Цаашид ч тус ажил үргэлжлэн зохион байгуулагдах юм.

Тайлант хугацаанд зохион байгуулагдсан хэсэгчилсэн болон нэгдсэн арга хэмжээнүүд үр дүнгээ өгч бодитой ажил хэрэг болж чадсан нь төрийн байгууллагууд болон иргэдийн хамтын ажиллагааны үр дүн байсан юм. Хамтран ажилласан байгууллага, хамт олон, бүх хүмүүст талархснаа илэрхийлье.