Сонгинохайрхан дүүргийн ерөнхий боловсролын сургуулиудын сурагчдын өсвөрийн сэргийлэгч бүлгэмийн үйл ажиллагааг шинэчилж энэ жилээс тогтмолжуулсан билээ. Шинэ хичээлийн жил эхэлсэнтэй холбогдуулан дүүргийн Гэмт хэргээс урьдчилан сэргийлэх ажлыг зохицуулах салбар зөвлөл Боловсролын хэлтэс, Цагдаагийн газартай хамтран шинэ гишүүдэд батламж, энгэрийн тэмдэг гардууллаа.

Ер нь хүүхдүүдтэй аль болох энгийн, илэн далангүй ярилцах нь ойлголцоход хялбар байдаг юм. Хийж буй ажил, цаашид төлөвлөсөн зүйлс, ирээдүй, өөрийгөө хайрлах, хорт зуршлаас сэргийлэх, мэргэжил сонголт, цахим орчинд хэрхэн зөв байх, гэмт халдлагаас биеэ хамгаалах, эх орон, улс төр, гадаад улсад суралцах зэрэг маш өргөн хүрээнд нээлттэй ярилцлаа. Хүүхдүүд маань ирээдүйдээ итгэх итгэл дүүрэн байна. Гол нь төрөл бүрийн зөв мэдээлэл, зөв замд хөтлөх тэр үйл хэрэг л чухал байгааг олж харлаа.

Мөн цагдаагийн 1-р хэлтсийн ахлах мэргэжилтэн, ахмад Г.Гантүвшин, Хар тамхитай тэмцэх албаны Урьдчилан сэргийлэх, хамтын ажиллагааны хэлтсийн мэргэжилтэн, дэслэгч С.Ууганзаяа нар сургуулийн орчин дахь үе тэнгийн дээрэлхэлт, мансууруулах бодисын хэрэглээний нөлөөлөл, хор уршиг, гэмт хэрэг, зөрчлөөс урьдчилан сэргийлэх чиглэлээр сургалт хийлээ.

Арга хэмжээнд ахлах бүлгийн 27 сургуулийн 200 гаруй ахлагч болон өсвөрийн сэргийлэгч хүүхдүүд оролцсон бөгөөөд тэдний хувьд сургуулийн орчин дахь гэмт хэрэг, зөрчлөөс урьдчилан сэргийлэх ажилд гар бие оролцож сайн дурын үйл ажиллагаа явуулах юм.

Ташрамд сайн дурын ажилд хэдий үр дүнтэй оролцоно тэр хэмжээгээрээ сургуулиа төгсөөд олон улсын тэтгэлэгт хөтөлбөрт хамрагдах боломж нэмэгддэг юм. Энэ хүрээнд ч хүүхдүүд маань сурахын хажуугаар арга хэмжээнд идэвхитэй оролцож, бүлгэмийн үйл ажиллагааг хичээл зүтгэлтэй үргэлжлүүлж, зөв зүйл, зөв үйлийг сургуулиуд дээрээ түгээх ажилдаа орцгоож байна.

Аан бас ханиад томуу дэгдэлт их байгаа тул арга хэмжээ хийхийг хориглосон 12 сарын 1-ний өдрөөс өмнө халдвар хамгааллын дэглэмээ бариад хурлаа хийсэн шүү бид нар. Арга хэмжээ зохион байгуулахад дэмжсэн Өнөр сургуулийнхандаа, хамтран оролцсон бүх байгууллагууддаа талархснаа илэрхийлье.