Өнөөдөр /2025.10.13/ Гамшгийн эрсдэлийг бууруулах Олон улсын өдөр тохиож байна. Сонгинохайрхан дүүрэг энэхүү өдрийг угтан 10-р сарын 2-нд “Өсвөр үе-Бидний ирээдүй” томоохон арга хэмжээг амжилттай зохион байгуулсан бол өнөөдөр сурагчдын дунд илтгэлийн уралдаан боллоо.

Дүүргийн Гамшгийн эрсдэлийг бууруулах орон нутгийн зөвлөл, Улаан загалмайн хороо, Онцгой байдлын хэлтэс, Боловсролын хэлтэс хамтран зохион байгуулсан тус уралдаан нь өсвөр үеийнхнийг гамшгийн эрсдэлээс урьдчилан сэргийлэх, мэдлэг, дадлыг нэмэгдүүлэх, аюулгүй амьдрах арга ухаанд суралцах, зөв хандлага төлөвшүүлэх зорилготой бөгөөд уралдаанд дүүргийн ерөнхий боловсролын сургуулиуд бүрээс шалгарсан сурагчид оролцож, өөрсдийн илтгэлээ танилцуулсан юм.

Тэргүүн байранд 105 дугаар сургуулийн 11б ангийн сурагч Н.Мөнгөнсарнай, дэд байранд 152 дугаар сургуулийн 12а ангийн сурагч Г.Нандинбулаг, гуравдугаар байранд “Өнөр” цогцолбор сургуулийн 10а ангийн сурагч О.Солонгомаа, тусгай байранд 151 дүгээр сургуулийн 11в ангийн сурагч А.Цогтсайхан нар тус тус шалгарлаа.

НҮБ-ын Ерөнхий Ассамблейн шийдвэрээр жил бүрийн 10 дугаар сарын 13-ныг Гамшгийн эрсдэлийг бууруулах олон улсын өдөр болгон тэмдэглэж ирсэн бөгөөд энэ жил 36 дахь жилдээ “Санхүүжилтийг гамшгийн үед зарцуулахаас илүү, даван туулах чадавхыг бэхжүүлэхэд чиглүүлье” урианы дор тэмдэглэж байна.