Өнөөдөр /2025.10.02/ Сонгинохайрхан дүүргийн ерөнхий боловсролын 30 сургуулийн 700 гаруй сурагчид нэгэн өдрийг гамшгийн эрсдэл, гэмт хэрэг зөрчлөөс урьдчилан сэргийлэх мэдлэг, дадал эзэмшиж өнгөрүүллээ. Олон улсын Гамшгийн эрсдлийг бууруулах өдрийг угтан энэхүү арга хэмжээг зохион байгуулж буй юм.

Гамшиг, аюулт үзэгдэлд өртөхөөс урьдчилан сэргийлэх нь эрсдэлийг бууруулах төлөвлөх, даван туулах чадавхыг нэмэгдүүлэх, иргэдийн оролцоог өргөжүүлэхэд чиглэдэг бөгөөд энэ хүрээнд дүүргийн Гамшгийн эрсдэлийг бууруулах орон нутгийн зөвлөл болон Гэмт хэргээс урьдчилан сэргийлэх ажлыг зохицуулах салбар зөвлөл хамтран “Өсвөр үе – бидний ирээдүй” нэгдсэн арга хэмжээг зохион байгуулсан юм.

Тус арга хэмжээний үеэр Онцгой байдлын алба хаагчид гамшиг, гал түймрийн аюулаас урьдчилан сэргийлэх практик сургалт, үзүүлбэр үзүүлж, бодит нөхцөлд хэрхэн аврах ажиллагаа явуулдгийг харуулсан нь хүүхдүүдийн сонирхлыг татав. Үүнээс гадна гэмт хэрэг, зөрчлөөс урьдчилан сэргийлэх тухай лекц, илтгэлийг холбогдох байгууллагууд танилцуулж, өсвөр үеийнхэнд тулгамдаж буй аюул, эрсдэлийн талаарх ойлголтыг өглөө.

Сурагчдын хувьд зөвхөн аюулгүй байдлын мэдлэгээр зогсохгүй ирээдүйн зорилго, мэргэжлээ сонгох чиглэлд хэрэгцээтэй мэдээлэл авсан нь онцлог байв. Манай улсад суугаа зарим улсын Элчин сайдын яамдын төлөөлөгчид хүрэлцэн ирж, гадаадад хэрхэн суралцах, тэтгэлэгт хөтөлбөрт хамрагдах боломжуудын талаар өсвөр үеийнхэнд зөвлөгөө өгсөн юм.

“Өсвөр үе-Бидний ирээдүй” арга хэмжээг хамтран зохион байгуулж, хүүхэд багачуудад үнэ цэнтэй мэдлэг түгээн ажилласан Сонгинохайрхан дүүргийн Онцгой байдлын хэлтэс, НОБГ-ын Гамшгаас урьдчилан сэргийлэх хэлтэс, дүүргийн Прокурорын газар, Шүүх шинжилгээний хүрээлэн, дүүргийн Улаан загалмайн хороо болон Бүгд Найрамдах Хятад Ард Улс, Бүгд Найрамдах Чех Улс, Бүгд Найрамдах Унгар Улс, Оросын Холбооны Улс, Япон улсуудаас Монгол Улсад суугаа элчин сайдын яамдын төлөөлөл, Монголын хөгжлийн цогц академи ТББ, “Их Засаг” Их сургууль, Санхүү эдийн засгийн Их сургууль зэрэг оролцсон байгууллагууддаа гүн талархал илэрхийлье.