Өнөр хорооллын гудамжны авто зам, явган зам, иж бүрэн гудамжны ажлын хүрээнд Саппоро, Мөнгөн гүүр орчимд замыг 1 эгнээ болгож байгаад иргэд дургүйцэж буй юм. Энэ талаар замын ажлын гүйцэтгэгч, зураг төсөл, гүйцэтгэлийн хяналт хийж буй инженерүүдтэй иргэдийн хамт уулзлаа. Осол аваар үүсэх, түргэн тусламж зэрэг яаралтай үед шахаж, зөрөх зайгүй, тойрч гарах аргагүй байгааг иргэд учирлаж байна. Үүнийг төслийн нэгж болон зураг төсөл гүйцэтгэсэн байгууллагаас яг ямар тооцоолол, үндэслэлээр ингэж шийдсэнийг нээлттэй танилцуулахыг хүсэв. Замын зураг төсөл, хөдөлгөөний эрчим, бусад ойролцоох замуудын урсгалтай уялдах зэргийг Нийслэлийн Авто замын газар, Замын хөдөлгөөний удирдлагын төв, Тээврийн цагдаагийн албатай зөвшилцөж экспертүүд хянаж, магадлал хийлгэсэн талаар төслийн гүйцэтгэгчид мөн хэлж байна. Иймд энэ асуудлаар холбогдох газруудаас тодруулж мэдээллийг ил тод нээлттэй байлгахыг хүслээ. Мөн замыг өргөн болгож өөрчлөх боломжийг эрэлхийлэхээр тохиролцов. Түүнчлэн орчны бохирдол үүсч буй, шороо тоос, хөдөлмөр хамгаалал, хашаа хайс, аюулгүй ажиллагаан дээр анхаарах шаардлагатай байгааг санууллаа.

14-р хороо, 14-р байрны урд байрлах ил зогсоол ажиллаж буй талбайд Цэ трэйд ХХК Тохижилт бүхий газар доорх авто зогсоол, үйлчилгээний барилгын ажил эхлүүлэхээр хашаа барьж эхэлснээр иргэд, оршин суугчдын эсэргүүцэлтэй тулгарчээ. Барилгын оронд нийтийн эзэмшлийн авто зогсоол, ногоон байгууламж болгуулах хүсэлтэйг оршин суугчид илэрхийлж байна. Иргэд эсэргүүцлээ илэрхийлж, гарын үсэг бүхий гомдол саналыг надад өгч байна. Иймд тухайн асуудлаар холбогдох газруудаас мэдээллүүдийг гаргуулж газар эзэмшигч буюу төсөл эхлүүлэхээр зэхэж буй талтай мөн уулзаж нөхцөл байдлыг хуулийн хүрээнд иргэд, оршин суугчдын хүсэлт, шаардлагын дагуу шийдвэрлэх нь зүйтэй юм.

14-р хорооны урд хэсэг, төв замын ард 3-4 дэн буудал бөөгнөрсөн, баар, кораоке ажилладаг зэргээс орчны бохирдолтой, шөнө орой дуу чимээ ихтэй, согтуу хөлчүү, явуулын хүмүүс их холхидог зэргээс гэмт хэрэг, зөрчил олноор үйлдэгддэг, иргэдийн эрүүл, аюулгүй орчинд амьдрах эрхэнд халдаж буй талаар мөн оршин суугчид гомдол мэдүүлж байна. Нутаг дэвсгэрийг хариуцсан Цагдаагийн байгууллагаас мөн тухайн байршилд дуудлага мэдээлэл тасардаггүй талаар хэлж байна. Иймд тухайн байршилд гэмт, хэрэг зөрчлөөс урьдчилан сэргийлэх хүрээнд ажлын хэсэг гаргаж ажиллах, байгууллага, аж ахуйн нэгжүүдтэй уулзаж зөрчлийг арилгуулах, үйл ажиллагааны чиглэлд өөрчлөлт оруулах талаар иргэдтэй хамтарч ажиллахаар тохиролцов.

17-р хорооны 32, 33-р байрны дундах далд зогсоолын асуудлаар иргэдтэй мөн уулзлаа. Тухайн асуудлаар Иргэдийн Төлөөлөгчдийн Хурлаас ажлын хэсэг байгуулагдан ажиллаж байгаа бөгөөд тус ажлын хэсгийн дүгнэлт саналын хүрээнд үүссэн асуудалд шийдэл гарахаар хүлээгдэж буй юм. Ажлын хэсгийн дүгнэлтийг эцэслэж тухайн авто зогсоолын 10 гаруй жил маргаан дагуулсан, иргэдийг хохироосон асуудлыг шийдэхээр ажиллаж байгаа билээ.