Сонгинохайрхан дүүргийн гэмт хэргээс урьдчилан сэргийлэх ажлыг зохицуулах салбар зөвлөлөөс 43 хорооны хамтарсан багийн бүрэлдэхүүнд Цагдаагийн Ерөнхий газрын Хар тамхитай тэмцэх газар, СХД-ийн Прокурорын газартай хамтран сургалт зохион байгууллаа.

Арга хэмжээг дүүргийн Иргэдийн Төлөөлөчдийн Хурлын дарга Б.Золбоо нээж хэлсэн үгэндээ гэмт хэрэг, зөрчлөөс урьдчилан сэргийлэх нь дан ганц цагдаагийн байгууллагын ажил биш бөгөөд үүнд төрийн шат шатны байгууллагуудын оролцоо чухал гэдгийг онцлов. Мөн хороодын хэсгийн ахлагч, нийгмийн ажилтан, цагдаагийн хэсгийн байцаагчдын ажлын уялдаа холбоо, мэдээллийн урсгалыг сайжруулах, мэдлэг, мэдээллийг дээшлүүлэх шаардлагатай байгааг хэлсэн юм.

Хар тамхи, мансууруулах бодис, сэтгэцэд нөлөөлөх бэлдмэлийн хэрэглээ аюулын харанга дэлдэж буй энэ цаг үед сургалт зохион байгуулагдаж буй юм. Сургалтын үеэр хар тамхины хор хөнөөлөөс урьдчилан сэргийлэхэд хамтарсан багийн оролцоо, өсвөр насны хүүхдүүдэд тавих хараа хяналтыг сайжруулах, сэрэмжлүүлэх, урьдчилан сэргийлэх ажлыг нэгдсэн төлөвлөгөөтэйгөөр зохион байгуулах талаар хамтарсан багийнхан мэдээлэл солилцлоо.